O'zbekiston – Tojikiston: O'zaro hamkorlik masalalari muhokama qilindi
2024 yil 10 yanvar kuni "O'zbekiston temir yo'llari" AJ va tojik temir yo'li "Роҳи оҳани Тоҷикистон" DUK ma'muriyati o'rtasida uchrashuv bo'lib o'tdi. Uchrashuvdan ko‘zlangan asosiy maqsad ikki davlat o‘rtasidagi o‘zaro manfaatli hamkorlik masalalarini muhokama qilish edi.
Muzokaralar "O'zbekiston temir yo'llari" AJ boshqaruvi raisining birinchi o'rinbosari X.Raxmetov va "Роҳи оҳани Тоҷикистон" DUK boshlig'i K.Mirzoali rahbarligida o'tkazildi. Ikkala tomon ham hamkorlik qilishga va mintaqada temir yo'l infratuzilmasini rivojlantirishga tayyorligini bildirdi.
Muzokaralarning asosiy mavzularidan biri O'zbekiston va Tojikiston o'rtasidagi tarif siyosati bo'ldi. Tomonlar ikki mamlakat o'rtasida savdo va iqtisodiy hamkorlikni rivojlantirishga yordam beradigan moslashuvchan tariflar tizimini ishlab chiqishga intilishlarini ta'kidladilar.
Mamlakatlar o'rtasidagi tovar ayirboshlash hajmini oshirish zarurligi masalasi ham ko'tarildi. Tomonlar yuklarni yanada samarali yetkazib berish va tashqi savdo aloqalarini rivojlantirish uchun temir yo'l aloqalarini mustahkamlash va logistika infratuzilmasini yaxshilashdan manfaatdor ekanliklarini bildirdilar.
Uchrashuv yakunlari bo'yicha temir yo'l transporti sohasida kelgusida hamkorlik va qo'shma loyihalarni amalga oshirish bo'yicha kelishuvga erishildi. Tomonlar sheriklik va o'zaro manfaatli hamkorlik kelajakda muvaffaqiyatli rivojlanishiga umid bildirdi.
"O'zbekiston temir yo'llari" AJ
Axborot-tahliliy media markazi
“O‘zbekiston temir yo‘llari” AJ rasmiy saytining materiallaridan foydalanish, shu jumladan republikasiya qilish, faqat belgilangan shartlarni bajargan holatdagina foydalanish mumkin.
BELGILANGAN SHARTLARNI BAJARILMASLIK O‘ZBEKISTON RESPUBLIKASI QONUNCHILIGINING BUZILISHI HISOBLANADI
